Europako Batasuneko Atzerri ministroen Kontseiluak onartu du Kubarekin elkarrizketa politikoa sustatu eta lankidetza akordio bat negoziatzea. Bruselak 1996an erabaki zuen, Jose Maria Aznar Espainiako presidenteak bultzatuta, Habanarekiko harremanak Kubak giza eskubideetan egiten zituen aurrerapenen menpe jartzea. Ordutik Europako Batasunaren Jarrera Bateratuak blokeoa eragin du bi aldeen arteko harremanetan, eta, egoera hori gainditzeko, lankidetza aro berri bati nola ekin negoziatzea erabaki du Bruselak.
Aurrez hitzartua zuten Europako Batasuneko 28 estatu kideek Kubarekin alde biko harremanak sustatzea, eta eztabaidarik gabe onartu dute gai ordeneko puntu hori Atzerri ministroek.
Suitza ere hizpide izan dute Bruselan, erreferendumean Europako Batasuneko immigranteei muga ezatzea erabaki zutelako igandean. Suitzako herritarrek justuan onartu zuten Europako Batasuneko herritarren mugimendu askatasuna mugatzea, botoen %50,3rekin. Erabaki horrek "ondorioak" izango dituela eta Suitzak Bruselarekin dituen beste hitzarmenei eragingo diela adierazi dute Europako Batasuneko Atzerri ministroek.
