Evo Morales Boliviako presidente ohiak uste du bere aurkako «terrorismo» salaketa «legez kanpokoa» eta «konstituzioaren aurkakoa» dela. La Paz hiriburuko Fiskaltzak aurkeztu du salaketa, Barne Ministerioak zabaldutako grabazio batzuetan oinarrituta. Iturri ofizialen arabera, beste lider indigena batekin hitz egiten entzuten zaio bertan Moralesi, eta hiriak ixteko eskatzen dio. «Ez sartu janaririk hirietara. Benetako blokeo bat egingo dugu. Boliviatik kanporatu naute; blokeatu egingo ditugu irabazi arte». esan zuen Moralesek, fiskaltzaren txostenaren arabera.
Fiskaltzaren esanetan, Faustino Yucra buruzagi indigenak eta Moralesek telefonoz hitz egin zuten iazko azaroaren 14an, presidente ohia Mexikon zegoenean, baita hurrengo egunetan ere. Yucra bera apirilaren 8an atxilotu zuten, «terrorismoa, sedizioa eta terrorismoa finantzatzea» leporatuta.
