Txileko erreskate talde batek aditzera eman du «bizi zantzuak» atzeman dituela duela hilabete Beiruten jazo zen leherketagatik erori zen eraikin bateko hondakinen azpian. Erreskate taldeko kide batek Al Jazzera hedabideari esan dionez, eskaneatzeko erabiltzen duten makina baten bitartez bihotz taupaden eta arnasketaren —hemezortzi arnasaldi minutuko— zantzuak detektatu dituzte eraikineko beheko solairuan. Dena den, zuhur jokatzen ari dira. «Itxaropen txikiaizan nahi ditugu. Baten bat erreskatatuko bagenu, miraria izango litzateke».
Atzo hasi zuten erreskatea, baina iluntzerako bertan behera utzi zituzten lanak, garabirik ez zutelako eta eraikin osoa erortzeko beldur zirelako. Hala eta guztiz ere, inguruan zeuden zenbait herritarrek euren gain hartu zituzten erreskate lanak, eta bilaketari berrekin zioten. Handik gutxira batu zen Txileko erreskate taldea bilaketa horretara. Halako batean, taldeko zakurrak hondakinen artean pertsona bat bizirik zegoen seinalea eman zuen. Orduan, erreskate taldeak eskanerra erabili zuen hondakinen azpian zegoen pertsona bizirik ote zegoen jakiteko. Baieztapenaren ondoren, zulaketa lanei ekin diete. Bestalde, hondakin horien artean gorpu bat ere topatu dutela jakinarazi dute.
Leherketa ikusgarri batek dardarka jarri zuen Beirut abuztuaren 4an. Libanoko hiriburuko portuko lehergailu biltegi batek su hartu, eta horrek eragindako leherketa hainbat kilometrora ere sumatu zuten. Gutxienez 200 hildako eta 6.000 zauritu baino gehiago eragin zituen. Hilabete geroago, Libanoko armadak jakinarazi du 4,35 tona nitrato amoniako aurkitu dituela portuko sarreratik gertu. Ikerketa zabaldu dute inguruan substantzia kimiko arriskutsu gehiago ote dagoen jakiteko.
