"Jakitun gara kontuz ibiltzeko eguna dela. hala izan da historikoki, beraz herritarrei eskatzen diegu lasaitasunari eutsi diezaioten eta, liskarrik balego, Karabineroak garaiz iristeko lagun dezaten", esan du Txileko Barne eta Segurtasun Publikoko ministro Andres Chadwickek.
Karabinero kopurua bikoiztuko dute gaurko, "gaurko egunez txiletar guztiei lasaitasuna eta segurtasuna emateko". Chadwickek jakinarazi duenez, 224 zonalde arrisku berezikotzat jo dituzte, eta horiek zainduko dituzte bereziki poliziek.
Gobernuak eta oposizioak bakoitzak bere aldetik oroituko du Allenderen gobernua eraitsi zuen estatu kolpea. Moneda jauregian antolatu du ekitaldi bat gobernuak, eta Memoriaren Museoan, berriz, oposizioak.
Irailak 11 zituen. Tankeek inguratua zuten Moneda jauregia, Errepublikaren presidentearen egoitza, Santiagon (Txile). 10:45ean, militarrek kontrolatzen ez zuten irrati bakarra erabiliz, azken mezua bidali zion Txileko presidente Salvador Allendek bere herriari: "Jarrai iezaiozue jakiteari, berandu baino askoz lehenago, zumardi handiak berriro irekiko direla, eta handik pasatuko dela gizaki librea, gizarte hobea eraikitzeko". Ordu laurden geroago hasi ziren jauregiari bonbaz erasotzen.
