Marine Le Pen Frantziako FN Fronte Nazionaleko presidenteak gaur adierazi du Nicolas Sarkozy UMPko hautagaiari babesa eman diezaiokela, hark ekainean izango diren Frantziako Legebiltzarreko hauteskundeetan FN babesten badu.
"Espero dut Sarkozyk eta Copek [UMPko idazkari nagusiak] argitzea Legebiltzarreko hauteskundeetan FNren eta alderdi sozialistaren artean lehia badago, hautatua zein izatea gustatuko litzaieken", adierazi du RTL kateari emandako elkarrizketan.
Hala ere, Le Penek ohartarazi du Sarkozy eta PSko François Hollande presidente izanda ere, agintea Europako Batasunaren "diktaduraren menpe" egongo dela. Hollandek atzo Europa berri bat proposatu zuen, populismoaren aurka.
"Ez da presidentziarik egongo, Europako Batasunaren menpeko gestio ahul bat baizik", esan du.
Eskuin muturra, erabakigarri
Frantziako presidentetzarako hauteskundeetako lehen itzulian botoen %17,9 lortu zuen FNk, Sarkozyren eta Hollanderen atzetik. Eskuin muturreko boto-emaileak bihurtu dira bi hautagaien artean balantza alde batera edo bestera desorekatu dezaketenak. Maiatzaren 6an izango da bigarren itzulia.
