Leherketa bat izan da gaur eguerdian Frantzian hondakin erradioaktiboak tratatzeko biltegi batean —Marcoulen—, eta lagun bat hil da —Midi Libre-k esan du kiskalita zendu dela—; biltegiko langilea da hildakoa. Beste lau pertsona zaurituta daude; bat, larri.
EDF konpainak adierazi du "istripu industriala" izan dela, "ez istripu nuklearra". Dena dela, informazio askorik ez dago gertatutakoaren gainean. Dirudienez, leherketa hondakinak tratatzeko labeetako batean izan da. Labe horiek hondakinak erre eta horien bolumena murrizteko erabiltzen dituzte.
Leherketa 11:45ean izan da, eta 13:00etarako egoera kontrolatua zeukaten, EDFren arabera. Frantziak badaezpada abian jarri du alerta protokoloa, baina EDFk eta biek esan dute zentraletik kanpo ez duela erradioaktibitate arrastorik ez duela aurkitu. Zenbait hedabidek, ordea, adituen iritziak jaso eta ihes erradioaktibo arriskua badagoela esan dute.
"Giza drama da", aipatu du Eric Besson Frantziako Gobernuko Industria ministroak. Hara joan da Nathalie Kosciusko-Morizet Ingurumen ministroa.
Languedoc-Rousillon eskualdean dago Marcoule, herrialdearen hego-ekialdean. Hangoa da Frantziako zentral nuklear zaharrenetakoa.
