Miami eta Kolonbiatik datozen terroristek ez dute herriaren ibilbidea geldiaraziko", ohartarazi du Nicolas Maduro presidenteak erasoaren ostean egindako agerraldian. Haren aldekoek salatu dute "estatu kolpea jotzeko saioa" izan dela salatu dute Valenciako kuartel militarraren aurkakoa. Madurok berak zehaztu duenez, militar jantzitako zibilak ziren gehienak, eta teniente ohi bat zegoen "terroristatzat" jotako erasoaren buru. "Zenbaitek armak lapurtzea lortu zuten, eta haien bila ari gara orain", zehaztu dute iturri ofizialek.
Igande goizaldean izan zen erasoa. Militar jantzitako hogei lagun inguruko talde bat, Valencia hiriko Paramacay kuartelean sartu, eta kontrola hartzen saiatu da. Ordea, armadak aurre egin die, eta, ordu gutxiren buruan, kontrolpean hartu du egoera. Liskarretan, erasotzaileetako bi hil dituzte militarrek. Atxilotuak, berriz, hamar dira. Lerro hauek idazteko orduan, segurtasun indarrak ustez erasoa zuzendu duen militar ohi baten bila ari dira. Madurok alerta egoeran jarri ditu segurtasun indarrak.
Oposizioak ukatu egin du erasoarekin zerikusia izatea, eta ohartarazi dio estatuburuari ez dezala "erasoa erabil sorgin ehiza abiatzeko". Era berean, "hausnartzeko" eskatu dio gobernuari: "Argi dago armadak ere aldaketa nahi duela, gizarteak berak bezala".
