Interfax agentziari errusiazale batek adierazi dionez, oraindik ez dago biktimarik, baina Ukrainaren armadak kontrol postuen aurkako "eraso masiboa" hasi duela baieztatu du. Iturriaren arabera, hiriaren mendebaldean tiroketak entzuten dira. Kostan dago Mariupol hiria, Donetsk eskualdean, Ukrainaren hego-ekialdean.
Rusia Today hedabideak ere lekuko batekin hitz egiteko aukera izan du, eta hildakoak ere badirela baieztatu du horrek. "Eskuin Sektorea iritsi da Mariupolera; polizien uniformeak janzten dituzte, eta polizien buruak agintzen diena egiten dute", baieztatu du.
Ukrainako Parlamentuak, gainera, errusiazaleen aurkako operazioa luzatzea erabaki du; jada 45 eguneko zerbitzua bete duten soldaduak etxera bidaliko ditu, eta haien ordezkoak bidaliko. Orain arteko istiluetan Ukrainako lau soldadu hil dira, eta hogei inguru zauritu.
