Marokon bizi izan da Helena Maleno azken hogei urtean, baina joan den urtarrilaren 23an Rabatek herrialdetik kanporatu egin zuen, eta debekatu egin zion 14 urteko alaba ikustea 32 egunez. Migratzaileen giza eskubideen alde lan egiten duen Caminando Fronteras taldeak gaur salatu du gertatutakoa Madrilen eskainitako prentsaurreko batean.
«Iazko apiriletik 37 eraso, heriotza mehatxu eta jazarpen jasan ditut; Poliziak jarraitu egin nau, entzuketak egin dizkidate, eta bitan saiatu dira indarrez nire etxera sartzen», salatu du Malenok, eta eraso horien atzean egotea egotzi die Espainiako Polizia Nazionalaren Dokumentu Faltsuetarako eta Legez Kanpoko Immigraziorako Unitate Zentralari eta Marokoko Poliziari. «Nire bizitza eta nire alabarena arriskuan jarri dituzte hilabeteotan», esan du ekintzaileak.
Malenok gogorarazi du bi estatuek aitortu dutela haren lana ez dela delitua, baina, hala ere, kriminalizatu egin dutela urte hauetan guztietan. «Nire eta nire familiaren aurkako mehatxuak etengabeak izan dira urteotan». Hala ere, eskertu egin du Espainiako Gobernuak, eta, batez ere, Eskubide Sozialen ministro Ione Belarrak emandako laguntza: «Hala ere, tamalez, estatuko estolderiek eta giza eskubideen aldeko ekintzaileen aurkako jazarpenak pisu handiagoa dute».
Hala, taldeak eskatu dio Espainiako gobernuko presidente Pedro Sanchezi eten dezala Malenoren aurkako jazarpena, eta aitor dezatela migratzaileen alde egiten ari den lana. Idatzia hainbat erakundek sinatu dute, besteak beste, Toruturaren Aurkako Nazioarteko Erakundeak, Urgent Action Fund for Women’s Human Rightsek eta Front Line Defenders taldeak.
