Baxar al-Assad Siriako presidentea herritarrei mintzatu zaie gaur goizean, eta iragarri du martxoan konstituzio berria bozkatzeko galdeketara deituko dituela. Gainera, "indar politiko guztiak" bilduko dituen gobernuaren alde egin du Al-Assadek, eta, horregatik, Konstituzioa eginda egon arte itxaroteko eskatu die siriarrei.
Siriako presidenteak adierazi du nazioarteko potentziak Liga Arabiarra erabiltzen ari direla "Siriako kontuetan muturra sartzeko". Gaineratu du Siriak irabaziko duela "gerrako trafikanteen aurrean" baturik segitzen badu.
Liga Arabiarraren "hipokrisia" salatu du, eta aurpegiratu die Sirian erreformak eskatzen dituztela baina euren herrialdeetan ez dituztela ezartzen. "Mediku batek zigarro bat erretzen duen bitartean bere gaixoari gehiago ez erretzeko eskatzea bezala da". Haren hitzetan, Liga Arabiarra "mundu arabiarraren porroten ispilua" da.
Zuzenean mintzatu da Al-Assad telebistaz, eta esan du herrialdean izaten ari diren istiluek "orbain gogorra" egin diotela bihotzean. Salaketak salaketa, nabarmendu du Liga Arabiarreko behatzaileak onartu dituela. Oposizioak porrot egin duela esan du, eta berak ez dituela bere ardurak saihestuko; herritarren babesa duela erantsi du.
