Libiako matxinatuen iturri batzuek eguerdian zabaldu dute euren gobernua eratu dutela, presidentea eta guzti izendatuz: Mahmmud Yabril. Haien arabera, honek izango zuen ministroak izendatzeko ahalmena.
Arratsaldean, ordea, Kontseilu Nazionalak argitu du hori ez dela horrela, "gaizki-ulertzea" egon dela oposizioan eta ez dutela presidenterik izendatu. Kontseiluak dio Yabril bera harritu egin dela eguerdiko albistearen berri izatean.
Gaddafi: "Azkenera arte egingo dut borroka"
Muammar Gaddafi Libiako agintaria ez dago amore emateko prest. Tripoli hegoaldean duen etxetik gaur diskurtsoa eman du telebistaren bidez, eta azkenera arte borroka egingo duela eta irabaziko duela esan du. Etxe hori igandean bonbardatu zuen nazioarteko koalizioak. Bere aldekoak erasoei eustera deitu ditu, diskurtso horretan.
Haren soldaduek gaur arratsaldean Misratan erasoa egin eta hamasei lagun hil dituzte. Haien artean, bost haur.
Hillary Clinton AEBetako Estatu idazkariak, ordea, "gertuko pertsonak" Gaddafirentzat irtenbide baten bila ari direla esan du ABC telebista katearen elkarrizketa batean, eta nazioartean horretarako laguntza eskatzen ari direla. Zenbait hedabidek esan dutenez, babes eske ari dira Gaddafirentzat. AEBek horrelako irtenbide bat ondo ikusiko luketela iradoki du.
