Angela Merkel Alemaniako kantzilerrak herrialdeko barne espioitzarako burua kargutik kendu du, berak egindako adierazpen batzuetan zalantzan jarri duelako neonaziak atzerritarrei jazarri zaizkiela. Hans-Georg Massen Konstituzioaren Babeserako Bulego Federaleko presidentea da gobernuak kargutik kendu duen arduraduna.
Massenek Barne Ministerioko Estatu Zuzendaritzan jardungo du orain. Hala erabaki dute Horst Seehofer Barne Ministerioak, Andrea Nahles SPDko presidenteak eta Merkelek berak, bilera batean. Erabaki horrekin, gobernuak amaiera eman nahi dio Maassenen adierazpenek gobernu barruan eragindako tentsioei.
Joan den abuztuaren 26an, argi ez dauden gertaera batzuetan, 35 urteko alemaniar bat hil zuten —jatorri kubatarra zuen—, eta neonaziak kalera atera ziren. Zortziehun bat elkartu ziren lehen kolpean, "migratzaileak ehizatzera". Neonazien jazarpena jasotzen zuen bideo baten egiazkotasuna zalantzan jarri zuen Maassenek. Adierazi zuen desinformazio kanpaina baten parte zirela.
Maassen hitzek bereganako kritikak areagotu zituen. Aurretik ere AFD ultraeskuinieko alderdiaren gertuko jotzen zuten zenbait sektorek, eta, neonazien erasoei buruz esandakoen ondoren, SPDk kargutik kentzea eskatu zuen.
Horrez gain, ARD telebistaren arabera, Maassek isilpeko informazioa erraztu zion AFDri. Telebistaren esanetan, Konstituzioaren Babeserako Bulego Federalaren txosteneko pasarte batzuk bidali zizkion alderdi ultraeskuindarrari hura argitaratu baino bost aste lehenago.
