Mitt Romney Massachusettseko gobernadore ohiak Wyoming estatuan garaipena lortu du, botoen %39rekin. Rick Santorumek, haren aurkari zuzenak, botoen %33 lortu du, CNN katearen arabera.
Bestalde, Ron Paul hautagaiak botoen %20 eskuratu ditu, eta Newt Gingrich hautagaiak, berriz, %8. Ondorioz, Paulek sei ordezkari gehiago izango ditu, eta Gingrichek, bat gehiago.
Otsail osoan izan dituzte hauteskundeak Wyomingen, eta gaur amaitu dute azken kontaketa. Romneyk atzo Arizonan eta Michiganen irabazi zuen, eta AEBetako errepublikanoen lehian lehen postuan da.
Wyomingeko emaitzak, hala ere, ez du aparteko garrantzirik azaroan izango diren hauteskundeei begira, herrialde osoan biztanle gutxien duen estatua delako eta 2.000 lagun inguruk bakarrik parte hartu dutelako.
