Emmerson Mnangagwa Zimbabweko presidenteorde zena, herrialdeko behin behineko presidente da orain, eta 1980 urteaz geroztik Zimbabweko presidente izan den Robert Mugabe ordezkatu du karguan.
Mnangagwak hitz eman du herrialdearen eta konstituzioaren "zerbitzura" jardungo duela. "Zimbabueko herriaren eskubideak babestu eta sustatuko ditut. Nire eginbeharrak indar osoz eta nire ahal onenekin beteko ditut".
Kargu hartzera hurbildu den jendeak txalo artean hartu du behin behineko presidente berria. Aldiz, bertaratutakoek txistu egin diete Mnangagwaren ondoren zin egin duten segurtasun indarretako zenbait buruzagiri. Besteren artean, polizia buruari. Grace Mugabe presidente ohiaren emaztearen hurbilekoa dela deritzote txistu egin diotenek.
Hain zuzen, Grace Mugabek zen bere senarra karguan ordezkatzeko hautagai aurkeztu zuen bere burua —eta Mnangagwaren aurkari zuzen bihurtu zen—. Lehia horrek piztu dituen tentsioekin lotu dute joan den asteko militarren esku hartzea.
Ekitaldian nazioarteko hainbat ordezkarik parte hartu dute. Bertan izan dira Hegoafrikako Telekomunikazio ministroa, Botsuanako presidentea, eta Zambia eta Namibiako ordezkariak. Robert Mugabe ez da ekitaldian izan.
