Mohamed Assaf 22 urteko gazte palestinarrak 'Arab Idol' kanta lehiaketa irabazi zuen bart gauean. Gazteak bazuen oihartzun handia palestinarren artean, baina atzo garaipena lortu osteko hitzek are handiagoa egin zuten oihartzun hori.
Lehiaketaren garaile zela jakitean, belauniko jarri, eszenatokiari musu eman eta Gaza eta Zisjordaniako biztanleei eskaini zien garaipena: "Palestinako herriari, martiriei, presoei eta zaurituei eskaintzen diet garaipena".
Herrialdea batu egin du Assafen kantuak aurrena eta eskaintzak gero, eta herrialde arabiarretako fenomeno bihurtu da. "Garaipen hau harrotasun iturri eta Palestinako herriaren garaipena da, Jerusalem hiriburu duen estatu independente bihurtzeko ametsaren bidean", esan du Mahmud Abbas Palestinako Aginte Nazionaleko presidenteak. Areago, Assaf Palestinako Errefuxiatuen Agentziarako NBEko enbaxadore izendatu du Abbasek.
