Yemen ipar-mendebaldeko Abs hiriko ospitale bat bonbardatu zuten astelehenean, eta 11 lagun hil eta 19 zauritu zituzten. 2015etik, MSF Mugarik Gabeko Medikuen laguntzaz kudeatzen dute ospitalea. Eraikinaren zati bat suntsitu zuen erasoak, eta hustu egin behar izan zuten. Mugarik Gabeko Medikuek azaldu dute gatazkaren "bi aldeek" zutela ospitalearen kokalekuaren berri. Gaineratu dute "onartezina" dela ospitalea bonbardatu izana, eta osasun zentroak ez erasotzeko dei egin dute. Saudi Arabiak zuzentzen duen nazioarteko koalizioari egozten diote erasoa.
Arabiar koalizioak "presazko ikerketa independentea" ireki du, eta jakinarazi du ondorien berri emango duela. Bestalde, jakinarazi dute Saada probintzian eskola baten aurka izan zen erasoa ere ikertzen ari direla. Joan den larunbatean izan zen erasoa, eta 10 haur hil eta 28 zauritu ziren.
Iragan abuztuaren 6an elkarrizketak amaitu zituztenetik, arabiar koalizioak ugaritu egin ditu huthien (matxino xiitak) aurkako aireko erasoak.
