Nelson Mandelaren heriotzak munduko mandatari asko eta asko elkartuko ditu bihar. Maite Nkoana-Mashaban Atzerri ministroak esan duenez, haren heriotzak sortu duen interesak "ez du aurrekaririk", gonbidapenik bidali gabe ere agintari gehienek joan nahi izan dutelako Hegoafrikara. "Nazioarteko buruzagiek horren denbora gutxirekin Hegoafrikara joateko duten asmoak erakusten du Nelson Mandelak mundu osoko jendearen bihotzean duen lekua".
Hiletaren ostean, Nelson Mandelaren gorpua Pretoriako kaleetan zehar eramango dute, hilaren 11tik 13ra, herritarrek agur esan diezaioten.
Ehunka ekitaldi egiten ari dira haren omenez Hegoafrikan, eta Johannesburgoko etxea zuenaren aurrera milaka lagun joan dira dagoeneko. Gaur arratsaldean, Mandela Fundazioak egingo dio omenaldia, Desmond Tuturen eskutik.
