AEBetako agentzia espazialak eman du horren berri: "Zorionak; Maven Marteren orbitan dago orain". Misioa gidatzen ari diren gune nagusia Denverren dago, AEBetan. Txaloka hartu dute lorpena. 2013ko azaroan abiatu zen, eta, espero bezala, gaur heldu da.
Curiosity robotaren ikerketa lana osatuko du Mavenek, atmosfera izango baitu aztergai. Martek duela milioika urte galdu zuen bere atmosfera, eta hori zergatik gertatu zen argitzea du helburu Maven misioak. Hala, jakin nahi dute, besteak beste, zergatik bihurtu den basamortu garai batean ur likido mordoa zeukan eta epela zen planeta hori.
NASAk hamar urte igaro ditu proiektuaren kontzeptua eta espaziora bidali dituzten gailuak garatzen.
