Muammar Gaddafiren aldekoak geroz eta egoera estuagoan daude. NATOk gogortu egin ditu azken orduetan bonbardaketak Surten, eta, horretaz gain, Gaddafiren aldekoek kontrolatzen duten beste hiri bati ere eraso dio, Sebha hiriari. Trantsiziorako Kontseilu Nazionalak Gaddafiren aldekoei errenditzeko eman zien epea larunbatean amaituko da.
Surten hogei jomuga inguru suntsitu dituela esan du NATOk, eta atzo sei tanke eta gerrarako beste sei ibilgailu jo zituela gaineratu du. Sebhan, berriz, lurretik airera misilak jaurtitzeko instalazioak suntsitu ditu. Bani Waliden, berriz, erasoak eten ditu NATOk, Gaddafiren aldekoak amore eman dezaten akordioa lortzeko zorian daudela esan baitute matxinatuek.
