Gaur NATOko beste lau soldadu hil dituzte Afganistanen, hegoaldean lehertutako bonba baten ondorioz. Atzo beste lau hil zituzten, nazioarteko erakunde militarrak jakinarazi duenez.
NATOk oraindik ez du esan hildako horiek nongoak diren.
Urte honetan zehar erakundeak 23.000 soldadu erretiratuko ditu Afganistandik, harako NATOk duen arduradun nagusi Carsten Jacobsen-ek astelehenean iragarri zuenez. Ondorioz, Afganistanen dituen soldaduen artetik ia bostetik bat erretiratuko du NATOk.
Gaurko beste atentatu batean zazpi zibil hil dituzte, edukiontzi batetan jarritako bonba bat lehertarazita. Haietatik sei, haurrak dira.
