Nazio Batuen Erakundearen txosten baten arabera, Siriako haurrek eurek salatu dute armadak giza ezkutu gisa erabili dituela. Horien arabera, asko behartu egin dituzte tankeetara igo eta oposizioaren erasoak geldiaraztera.
Radhika Coomaraswamy NBEren ordezkariak gaineratu du hainbat haur torturatu egin dituztela atxilotzen zituzten bitartean, eta beste hainbat hil egin dituztela salatu du.
Coomaraswamyk BBC kateari adierazi dio haren taldea txosten "izugarriekin" itzuli dela Siriatik. Gaineratu du ez duela sekula halako egoerarik ikusi, non haurrak helburu diren.
Horrekin batera, Siriako Armada Askea ere kritikatzen du txostenak, haurrak arriskuan jartzeagatik.
