Inkesten emaitzak ezeztatu egin dituzte atzo Israelen parlamentua aukeratzeko botoa ematera joan ziren herritarrek —hautesleen %71,8k bozkatu dute—; izan ere, beste behin Likud alderdiari eta haren buru Benjamin Netanyahuri eman diote botoa. Hala, gaur egungo Israelgo lehenengo ministroa bere laugarren agintaldiaren atarian legoke.
Gobernua osatzeko nazionalista eskuindarren eta muturreko ortodoxoen babesa eskuratzeko harremanak hasiko dituela iragarri du Netanyahuk.
#Netanyahu-ren txioa. pic.twitter.com/CoSaT5cMkg
— Ane Irazabal (@AneIrazabal) March 17, 2015Ia boto guztiak zenbatuta, parlamentuaren 30 eserleku eskuratu ditu Likud alderdi kontserbadoreak. Hala, alde handia atera dio Herzog eta Livniren Batasun Sionista koalizioari, 24 eserleku eskuratu baititu. Lau alderdi arabiarren koalizioak, berriz, 14 erdietsi ditu. Orotara, 120 eserlekuk osatzen dute parlamentua.
Batasun Sionista alderdiak ez zituen espero emaitza hauek; adierazi du "egun zaila" dutela gaurkoa.
Ia sei milioi hautesle zeuden botoa ematera deituak Israelgo 20. parlamentua egituratzeko. Guztira, 26 alderdi politiko aurkeztu dira bozetara, baina hamar inguruk lortuko dituzte ordezkaritza izateko beharrezkoa diren botoen %3,25.
Arabiarren "mamua" haizatzen
Israelgo telebista kateek atzo hauteslekuak ixtean egindako zundaketen arabera, Batasun Sionista zentro-ezkerreko koalizioa eta Benjamin Netanyahu lehen ministroaren Likud alderdia ia berdinduta zeuden.
Netanyahuk argi erakutsi zuen urduri zegoela, bera buru izango lukeen eskuineko gobernua "arriskuan" zegoela idatzi baitzuen atzo Facebooken, kutsu arrazista nabarmeneko post batean: "Boto-emaile arabiarrak samaldan ari dira joaten hautetsontzietara. Ezkerreko erakundeek daramatzate".
