Nazioarteko Zigor Auzitegiko kide izateko lehen urratsa eman berri du PAN Palestinako Aginte Nazionalak. Prozesuak luze joko duen arren, Israelek dagoeneko ohartarazi du horrek ekar ditzakeen ondorioez. Izan ere, Benjamin Netanyahu lehen ministroaren hitzetan, Tel Aviv ez da "besoak gurutzatuta" geratuko eta "defendatu" egingo ditu soldadu islaedarrak.
Buruzagi palestinarrak egindako mugimenduari azkar erantzun dio Israelgo Gobernuak, eta iragarri du ez dizkiola itzuliko herritar palestinarrek zergen bidez ordaindutako 125 milioi dolarrak. Horretaz gain, AEBetako Gobernuari ere eskatu dio laguntza Netanyahuk. Izan ere, Barack Obamaren Gobernuak iaz onartutako egitasmoaren arabera, Palestinak Israelen aurka egingo balu Nazioarteko Zigor Auzitegian, Washingtonek bertan behera utziko luke 400 milioi dolarreko urteroko diru laguntza.
