167 eserleku ditu ganberak, eta Batasun Demokratikoko Mahaiak eskuratu du gehiengoa bertan. Parte hartzea %74,5ekoa izan da, eta emaitzak behin betikotzat jo dituzte, botoen %96,03 zenbatuta daudenez. Oposizioko koalizioa legebiltzarreko ordezkarien hiru bosten lortzeko eserleku bakarraren faltan geratu da, eta gehiengo horrek aukera emango ziokeen erreforma sakonak egiteko. Polo Patriotiko Handiak ehun ordezkari zituen orain arte, baina kolpean erdia baino gehiago galdu ditu.
Emaitzen berri izan eta gero, MUDek adierazi du "aldaketaren hasiera" direla legebiltzarrerako bozak: "Hasi da aldaketa Venezuelan, gaur arrazoiak ditugu ospatzeko", esan du Jesus Torrealba MUDeko idazkariak.
Porrota aitortu du Nicolas Maduro Venezuelako presidenteak: "Kontrako emaitza hauek onartzera etorri gara". "Konstituzioak eta demokraziak" irabazi dutela nabarmendu du.
Venezuelakoa sistema presidentzialista da, baina parlamentuak pisu handia du. 2000. urtean Hugo Chavez zenak prozesu konstituziogilea abiatu eta ganbera bakarreko sistema ezarri zuenetik, beti izan du chavismoak legebiltzarra kontrolpean.
