Lehengo ostegunean Gafsan (Tunisia) bere buruari su eman zion gizonezko tunisiarra hil egin da, Barne Ministerioak esan duenez. Langabezian zegoen gizona eta bere lan egoera salatzeko egin zuen protesta ekimena, gobernuak eskualde hartan duen egoitzaren atarian.
Erredura larriekin eraman zuten erietxera, eta atzo zendu zen.
Hildakoak —Ammar Garsala— 42 urte zituen, eta hiru seme-alaba zeuzkan.
2010eko abenduan Mohamed Buazizi 26 urteko gazteak lan arazoengatik bere buruari su eman ondoren —hil egin zen geroago—, gobernuaren kontrako protesta handiak piztu ziren, eta Ben Ali presidenteak iazko urtarrilaren 14an Tunisia utzi egin behar izan zuen.
Dena dela, erregimena bukatu arren, arazo ekonomiko eta sozialak ez dira amaitu.
