Venezuelako Gobernua hasi da prestatzen Hugo Chavezen hileta. Bart gauean jakinarazi duenez, ostiral arratsaldean egingo diote hileta presidente ohiari. Aurretik hil kapera hiru egunez egongo da Caracasen. Mundu osoko zenbait agintarik iragarri dute jada izango direla hiletan, gutxienez, ehundik gora, tartean, Hego Amerikako guztiak eta ziurrenik Mahmud Ahmadineyad Irangoa.
Hil kapera armadako akademian jarri dute, gaurtik, "hori delako iraultza bolivartarraren sorlekua, Chavez presidentearen jaiolekua", gobernuak ohar batean jakinarazi duenez. Dolu egunak zazpi izango dira Venezuelan. Gaur ospitaletik segizioan eraman dute gorpua akademia militarrera, eta harmailak jarri dituzte herritarrek ikus dezaten.
Jendea, kalean
Heriotzaren berri jakin denetik, jende asko atera da kalera Venezuelan Chavezen aldeko pankarta, elastiko eta mezuekin. Antonio Lopez zuzenean ari da Caracastik BERRIArentzat, eta haren argazkiak ikusgai jarri ditu Martxelo Otamendi BERRIAko zuzendariak Berriketan.info sare sozialean.
Dolua eta samina Venezuelatik haratago izango da. Argentinan ere hiru dolu egun izango dira, Cristina Fernandezek horrela aginduta. Buenos Airesen milaka herritar atera dira kalera Chavez gogoratzera. Bolivian astebeteko dolua izango da.
