Hainbat lekukok Efe agentziari jakinarazi diotenez, goizaldean zibil jantzitako hainbat soldadu sartu dira errefuxiatuen kanpamentura, atxiloketa bat egitera. Bertan zeudela, ehunka palestinarrek inguratu dituzte, eta tiroka hasi zaizkie soldaduak.
Robin Al-Abed, Yunis Yahyuh eta Jihad Aslan dira hildakoak. Al-Abedek 32 urte zituen, eta bularrean tiro bat jasota hil da. 22 urte zituen Yahyuhk, eta 20 Aslanek.
Halaber, larri daude zaurituetako bost, Ramallaheko Sheij Sayed erietxeko bozeramaile batek jakinarazi duenez. Kalandian bizi diren hainbat pertsonak azaldu dutenez, preso ohia zen Al-Abed; hamar urte egin zituen espetxean, eta duela hilabete geratu zen libre.
Israelgo armadak Efe agentziari azaldu dio gertatutakoa ikertzen ari direla eta ezin dutela informazio gehiago zabaldu.
