PALESTINARRAK, BAN-EKIN HASERRE

Ban Ki-moon NBE Nazio Batuen Erakundeko idazkari nagusia Gazan izan zen atzo. Israeli blokeoa «gehiago» arintzeko eskatu dio, bereziki lehengaien inportazioa eta herritarren mugimendua errazteko. Palestinarrek, baina, hagitz haserre hartu dute Ban, presoen eta Israelek hildakoen senideekin biltzeari uko egin diolako. Erezko kontrolgunean hainbat herritar bildu ziren protesta egiteko —irudian—, eta idazkari nagusiaren konboiari zapatak jaurti zizkioten mesprezua erakusteko. Arratsaldean, berriz, Banekin biltzekoa zen ordezkaritza zibil batek bertan behera utzi zuen bilera, idazkari nagusiaren erabakia «justifika ezina» dela argudiatuta.