PKK Siriako erregimenaren alde lanean ari dela salatu du oposizioak

Siriako Kontseilu Nazionalaren arabera, PKK Kurdistango Langileen Alderdiaren Siriako kideak erregimenarekin bat egin dute. «PKK-ko militanteak erabiltzen ditu Damaskok, eta errepresioan laguntzen diote horiek itzaletik», salatu du Mohammad Bassam Siriako oposizioko kideak eta Damaskoren Suediarako ordezkari ohiak.

Errusiak, berriz, Frantziari esan dio ez duela onartuko NBE Nazio Batuen Erakundearen Segurtasun Kontseiluan zigorrak ezartzeko ebazpenik, eta atzera bota du Parisen azken proposamena. Damaskoren alde eta Arabiar Ligaren misioaren aurka jendetza bildu zen hainbat hiritan, atzo. Protestetan hamabost lagun hil zituzten, atzo, gutxienez.