Manuel Jimenez Barrios Andaluziako Gobernuko presidenteordeak jakinarazi duenez, PSOEk irabazi ditu hauteskundeak, botoen %35,53 jasota. 2012an eskuratutako eserleku kopuru bera izango du PSOEk. Orduan, baina, hauteskundeak galdu egin zituen, eta orain, berriz, lehen indar da, botoen %97 zenbatuta.
Gainera, Andaluziako zortzi probintzietatik zazpitan nagusitu dira sozialistak, eta 2012an hirutan soilik irabazi zuen. Indartuta atera da, beraz, Susana Diez PSOEko Andaluziako idazkari nagusia.
Alderdi berriek, lau bototik bat
PPk 2012an 50 eserleku eskuratu zituen, baina kolpetik hamalau galdu ditu; botoen %26,64 jaso du. Orain bigarren indarra izan da PP, 33 parlamentarirekin. Ganbera Podemosek hamabost eserlekurekin (%14,85), Ciudadanosek bederatzirekin (%9,25) eta IUk bostekin (%6,91) osatuko dute. Podemosek eta Ciudadanosek lehen aldiz izango dute ordezkaritza Andaluziako Parlamentuan. IUk zazpi eserleku galdu ditu 2012ko hauteskundeekin alderatuta.
Babes handiarekin gobernatu nahi badu, Diazekin hiru aukera ditu akordioak bilatzeko: PP, Podemos eta Ciudadanos. Koalizio Handirik ez badago, litekeena da Ciudadanosekin egitea akordioa, Podemosek kanpainan behin eta berriz esan baitu ez duela akordiorik egingo PSOErekin.
