PSOEko idazkari nagusi eta Espainiako Gobernurako presidentegai Pedro Sanchezek baztertu egin du, beste behin, Kataluniaren etorkizun politikoari buruzko erreferendum bat egitea, iritzita "legez kanpokoa" dela. Horren ordez, elkarrizketa eta "akordio zehatzak" proposatu dizkio Sanchezek Carles Puigdemont Kataluniako Gobernuko presidenteari; betiere, "Espainiako Konstituzioaren barnean".
Bi ordezkariak Bartzelonan bildu dira, eta ondoren eginiko agerraldian azaldu ditu Sanchezek bileraren xehetasunak. Adierazi duenez, Artur Mas Kataluniako Gobernuko presidenteordeak Mariano Rajoy Espainiako Gobernuko jarduneko presidenteari 2014ko udan eginiko 23 eskarietako ugari betetzea proposatu dio Puigdemonti; gehienak, ekonomiari lotutakoak. Bide orri subiranista baztertu, eta beste bide bat eskaini dio, "elkarrizketan, elkar ulertzean eta elkarbizitzan" oinarritua. Bi gobernuen arteko alde biko batzordea berraktibatzea proposatu dio.
Puigdemontek, ordea, Sanchezi azaldu dio bide orri independentista "mugiezina" dela, "legezkoa, zilegia eta hautetsontzietan onartutakoa" delako.
