CiUk ez du bat egin gainontzeko alderdiekin, baina iragarri du ez diola eskaerari oztoporik jarriko. Hala, data zehaztuta geratu da, irailaren 2an, datorren ikasturtearen hasieran egingo du Jordi Pujolek agerraldia Kataluniako Parlamentuaren aurrean. Bertan, azken 34 urteetan atzerrian eta ezkutuan izan dituen diruen inguruko azalpenak eman beharko ditu.
Joan den astean, ezustean, egin zuen aitortza presidnete ohiak, krisi politiko eta instituzionala eraginez. Aste honetan, berriz, eta Artur Mas Generalitateko presidenterekin hitzartuta, presidente ohiaren abantailei eta ohorezko buruzagi izateari uko egin die Pujolek.
Azalpenak ez dira aski, ordea, askorentzat, eta Manos Limpias taldeak salaketa jarri du Pujolen eta haren emazte Marta Ferrusolaren aurka. Gaur jakinarazi du epaileak hura tramitera onartu duela eta dagoeneko martxan dela prozedura.
Hau guztia une ezin okerragoan heldu da Artur Mas Generalitateko presidentearentzat. Izan ere, Mariano Rajoy Espainiako gobernuburuarekin bildu aurreko egunetan eta galdeketarako lau hilabete eskas geratzen direnean lehertu da eskandalua. Gainera, Espainiako alderdiak ustelkeria auzia baliatzen ari dira galdeketaren aurka egiteko.
