Vladimir Putin Errusiako lehen ministroak iragarri du ez dituztela orain berriro egingo legebiltzarrerako hauteskundeak, iruzur salaketak dauden arren. "Bozak izan ziren, eta ezin da orduko emaitzei buruzko gainbegiratzeaz eztabaidarik zabaldu", esan du gaur Putinek. "Duma [legebiltzarra] martxan dago".
Errusia Batua Putinen eta Dimitri Medvedev presidentearen alderdiak gehiengoari eutsi zion abenduaren 4ko hauteskundeetan —gehiengo osoa lortzeke—, baina oposizioak ustelkeria salatu zuen hasieratik, eta bozak baliorik gabe utz ditzaten eskatzeko hainbat mobilizazio egin dituzte. Lehengo larunbatean, adibidez, 120.000 lagun bildu ziren Moskun manifestazio batean, antolatzaileen arabera —haien artean izan zen Mikhail Gorbatxov SESB Sobietar Errepublika Sozialisten Batasuneko azken presidentea—.
Martxa haren aurretik, Errusiako Giza Eskubideen Presidentzia Kontseiluak Hauteskunde Batzordeko buru Vladimir Churovek dimisioa eman beharko lukeela iradoki zuen, bozetako "iruzurrean" parte hartu zuelakoan.
