Errusiako Legebiltzarrerako hauteskundeetako emaitzen arabera, Vladimir Putin lehen ministroaren alderdiak —Errusia Batuak— eutsi egin dio gehiengo osoari parlamentuan, baina lehendik indarra galduta. Hauteskunde Batzordeak botoen %95 zenbatuta dituela dioenez, 238 diputatu lortu ditu Errusia Batuak (botoen %49,54), duela lau urte baino 77 gutxiago. 450 aulki daude legebiltzarrean.
PCR alderdi komunistak emaitzak ia bikoiztu eta 92 eskainu izango ditu (lehen, 57 zeuzkan), %19,16. Guennadi Ziuganov buruzagi komunistak salatu du Errusia Batuari botoen %15 gehiago eman dizkiotela. "Hauteskundeak ez dira inola ere zilegi izan, ez juridikoki, ez moralki".
RJ sozialistak 64 aulki bildu ditu (lehen, 38), %13,22. PLDR liberalak 56 (40), %9,14.
Atzo egin zituzten hauteskundeak, eta %60,2koa izan zen parte hartzea —orain dela lau urte %63koa—. Presidentziarakoak udaberrian izango dira.
