SDF Siriako Indar Demokratikoak —nagusiki YPG milizia kurduak osatua— adierazi du orain arte EI Estatu Islamikoaren esku zegoen Raqqa hiria kontrolatzen duela. SDFk, ordea, ez du baieztatu EIko kideen presentziarekin amaitu duenik inguruan. "Operazio militarra amaitu da Raqqan, orain lo dauden EIren zelulak amaitzeko operazioa abiatu dugu", azaldu du SDFko Talal Salu jeneralak.
Manbetxeko Kontseilu Militarreko —SDFko kide— bozeramaile Xervan Darwixek azaldu du oraindik EIko kideak geratzen direla hirian: "Oraindik EIko soldaduak daude udaleko estadioaren inguruan; ezin dugu esan Raqqa guztiz askatuta dagoela".
