Segurtasun Kontseiluak aho batez izendatu du Antonio Guterres Portugalgo lehen ministro ohia NBEko idazkari nagusi izateko, eta Batzar Orokorrari gomendatu dio ere berean babesteko izendapena. 193 kide ditu batzarrak, eta hurrengo astean da biltzekoa Guterresen hautagaitza berresteko. Ban Ki-moonek bi legealdi bete ditu erakundeko idazkari nagusi karguan, eta urte amaieran utziko du kargua. Banen hitzetan, Guterresen hautagaitza "aukera paregabea" da. "Ziur nago erronka guztiei ongi erantzuko diola, garapena bultzatuz, giza eskubideak defendatuz eta giza sufrimendua arinduz", esan du Banek.
Ingenieritza eta fisika ikasketak ditu Guterresek. Urte gutxi iraun zituen irakaskuntzan, 1974. urtean Alderdi Sozialistan izena eman baitzuen. Urte horretan kargugabetu zuten Antonio de Oliveira Salazar diktadorea Portugalen, eta azkar murgildu zen politikagintzan. Alderdi Sozialistako idazkari nagusia hautatu eta hiru urtera, 1995ean, lehen ministro kargua hartu zuen, 2002ra arte.
Siriako gerrari eta errefuxiatuen krisiari aurre egin beharko dio Guterresek. Azken afera horretan badu sobera eskarmentu, UNHCR Nazio Batuen Iheslarientzako Goi Mandataria izan baita 2005. urtetik. Haren ardurapean agentzia horrek erantzuteko gaitasuna handitu behar izan du. Herrialde aberastuei laguntza gehiago eskatzeko ahalegina egin du Guterresek. "Ezin diogu jendeari ihes egitea eragotzi. Etorri egingo dira. Aukera bakarra da haien etorrera nola kudeatuko dugun erabakitzea».
