Oriol Junqueras Kataluniako presidenteorde kargugabetua, Raul Romeva Atzerri kontseilari kargugabetua, Jordi Sanchez ANCko presidente ohia eta Jordi Cuixart Omnium Culturaleko presidentea Sant Joan de Vilatorradako presondegira eramango dituzte —Katalunia erdialdera, Bartzelonatik 50 bat kilometrotara—.
Dolors Bassa Lan kontseilari kargugabetua eta Carmen Forcadell Kataluniako Parlamentuko presidente ohia, berriz, Figuereseko kartzelara lekualdatuko dituzte —Katalunia ipar-ekialdera, Gironatik 43 bat kilometrora—.
Joquim Forn, Jordi Turrull eta Josep Rull kontseilari kargugabetuen tramiteak ez dituzte oraindik amaitu, eta, beraz, ez dituzte egunotan hurbilduko. Pedro Sanchez Espainiako presidentea eta Quim Torra Kataluniakoa datorren astelehenean batzartuko dira Madrilen.
Instrukzioa itxitakoan preso daudenak Kataluniara lekualdatzea "arrazoizkoa" irudituko litzaiokeela esan zuen Sanchezek. Ekainaren 18an egin zituen adierazpenok. Lau egun lehenago, Fernando Grande-Marlaska Barne ministroakhitz egin zuen auziaz, eta adierazi zuen Pablo Llarena epaileak balioztatuz gero ez litzatekeela "eragozpenik" egongo; Auzitegi Goreneko epaileak baiezkoa eman zion gobernuari.
