Sendagai baten ondorioz 1.000 lagunetik gora hil direla uste da Frantzian

Mediator izeneko botika batek 1.000 eta 2.000 lagun bitartean hil dituela uste da Frantzian. Sendagai hori diabetea zeukatenentzako argaltzeko sendagaia da, eta Gizarte Segurantzak pasa den hilean egin zuen azterketa baten arabera 500 pertsona hil zituela uste zen arren, hildakoen zifra lau aldiz handiagoa izan litekeela argitaratu du Le Figaro egunkariak. Gizarte Segurantzak azterketa berria egin du eta dirudienez gutxienez 1.000 pertsona hil ziren sendagai horren ondorioz, eta gehienez 2.000.

Iaz kendu zen merkatutik Mediator sendagaia, baina 1998an ere arriskutsua izan zitekeela adierazi zuen Frantziako Sendagaien Agentzia Nazionalak. Mediator hartzen duten pertsonei bihotzeko arazoak izateko arriskua hirukoiztu egiten zaie. 2007an Europako herrrialde askotan merkatutik ezabatu zuten sendagai hori zeukan arriskuagatik, baina Frantzian ez. Gainera, diabetea ez zeukaten jende askok hartzen zutela ere uste da.