Peresek dio egungo gobernuarekin bakea lortzeko urratsak egitea posible dela: “Bakea lortzeko Palestinari estatu izaera aitortzea beste aukerarik ez dago. Bakean bizi eta aurrera jarraitu ahal izateko aukera bakarra da”.
Israelgo Gobernuan koalizioak agintzen du, eta askotariko iritziak dauzkate prozesua aurrera eramateko orduan. Iritzi ezberdinekoa da, esate baterako, Naftali Bennett Ekonomia ministroa. Atzo adierazi baitzuen Palestinako estatuari “zentzurik” ez diola ikusten eta bake akordioa eteteko momentua dela.
Gertatutakoak atzean utzi eta etorkizunera begira jartzeko garaia dela ziurtatu du Israelgo presidenteak: “Iragana ezin da aldatu, alda dezakeguna etorkizuna da”. Etorkizun horretan zer egin behar den pentsatzea omen da gatazka konpontzeko gakoa; “palestinar eta israeldarrek” daukate hitza.
"Atzeratu daiteke, baina bakea ezin dugu saihestu"
Aldaketa garaia da mundu arabiarrean, eta Peresek dio bakearen aldeko joerak gora egin duela: “Bakea atzeratu dezakezu, baina ezin dugu saihestu. Jendeak ez du arriskuan bizi nahi. Bakea behar du”.
Bakearen eta etorkizunaren eraikuntzan, baina, desadostasunak sor daitezke, eta desadostasun horiek bake prozesua oztopa dezakete. Jerusalemen estatusa erabakitzea da gai korapilatsuenetako bat. Horregatik, negoziazioetan bukaerarako uztea erabaki dutela jakinarazi du Peresek: “Jerusalemen gaia atzeratzearekin bat gatoz bi aldeak, negoziazioak hasieratik zapuztu ditzake eta”.
