Damaskon atzo izandako bi atentatuen ondotik, Bashar Jaafari Siriako enbaxadoreak Nazio Batuen Erakundeko Segurtasun Kontseiluari eskatu dio "eraso terroristak" gelditzeko neurriak har ditzan. 55 lagun hil eta 372 zauritu ziren atzoko erasoetan.
"Gaur egun ederra da munduko hiri guztietan, eta bien bitartean, Damaskok egun odoltsu bat bizi izan du, bi leherketaren ondorioz errugabeak diren hildakoak eta zauritutakoak utzi dituelako", adierazi du gaur Segurtasun Kontseiluko azpi batzordearen aurrean.
Enbaxadoreak esan du erasoak Al-Qaedarenak izan daitezkeela, eta Ban Ki-moon NBEko idazkari nagusiari Sirian aritzen diren Al-Qaedako ustezko 26 lagunen zerrenda helarazi dio.
Al Jaafarik salatu du zenbait herrialdek "talde terroristak" diruz eta armekin laguntzen dituztela.
