Siriako Gobernuak gaur goizean ohartarazi du ez dituela tropak erretiratuko, "istiluak amaitzen ez diren bitartean".
"Segurtasuna eta bakea berrezartzen direnean soilik" erretiratuko ditu, Atzerri Ministeriotik Sana berri agentziari jakinarazi diotenez.
Gobernuak ziurtatu du armada "defentsa arrazoiengatik" dagoela kaleetan, baita "zibilak babesteko" ere. Armadak Homs bonbardatu zuen atzo oposizioaren arabera, eta gutxienez 30 lagun hil zituen herrialde osoan.
Kofi Annanek Iranera joan nahi du
Kofi Annan NBE Nazio Batuen Erakundearen eta Arabiar Ligaren mandatari bereziak Iranera joateko asmoa agertu du, Siriako gatazkari buruz hitz egiteko. Eskualdeko estatu garrantzitsuenekin bildu nahi du Annanek, bere planaren atzean "nazioartea batuta" egoteko.
Annanen ordezkari batek, bestalde, oposizioarekin hitz egingo du Turkian, armak uzteko eskatzeko. Siriako Lagunak taldeak bilera bat egingo du Istanbulen bihar.
Hillary Clinton AEBetako Estatu idazkariak plana aplikatzeko egutegia zehazteko eskatu dio gaur Annani.
