Siriako oposizioak salatu du Idleb eta Homs hirietan gobernuaren aldeko indarrek gutxienez hogei lagun hil dituztela gaur, gobernua gaurtik su-etenean egon arren. Siriako Kontseilu Nazionalak modu baketsuan manifestatzera deitu du gaurko.
Oposizioaren esanetan, "Damaskok trufa egiten dio nazioarteari", su-etenaren ostean indarkeriaren erabilera bertan behera utzi ez duelako. 06:00etan amaitu da erasoak eteteko Kofi Annanen planean ezarritako epea; Damaskok beteko duela esan du.
Siriako telebista ofizialak jakinarazi du Alepo hirian militar bat hil dela, leherketa baten ondorioz, eta eztandak beste 24 lagun zauritu dituela. Siriako Ikasle Askeen Elkarteak salatu du bertan segurtasun indarrek malko gasa jaurti dutela ikasleek egindako manifestaldiaren aurka.
"Egoerak lasaiagoa dirudi"
Ban Ki-moon Nazio Batuen Erakundeko idazkari nagusiaren esanetan Sirian egoerak "lasaiagoa" dirudi. Bertan gertatzen dena "hurbiletik" jarraituko dutela adierazi du. Halaber pazientzia eskatu du, oposizioak salatutako erasoen ildora. Baxar al Assad presidenteari su-etena mantentzeko galdegin dio. "Su-etena oso hauskorra da eta edozein momentutan apur liteke. Beste tiroketa bat nahikoa aitzaki izan liteke borroka pizteko", esan du NBEko idazkari nagusiak.
