Ban Ki-moon Nazio Batuen Erakundeko idazkari nagusiak gaur Segurtasun Kontseiluari eskatu dio Siriara "laster" 300 behatzaile bidaltzeko. Egoera "kaskarra" bada ere, su-etena egiaztatu behar duela gogorarazi dio.
"Ez da arriskuak dituen misioa, baina uste dut bakea eta Siriako herriaren borondatea erakusten duen akordio politiko bat lortzen lagun dezakeela", esan du Segurtasun Kontseiluko kideekin bildu ostean.
Ban Ki-moonek esan du Damaskok indarkeriarekin amaitzeko konpromisoa hartu bazuen ere, "zibilen inguruetan bonbardaketak daudela erakusten duten frogak" badaudela.
NBEko idazkari nagusiak proposatu du 300 behatzaile horiek hiru hilabetez egotea Sirian. Segurtasun Kontseiluak proposamen hori onartuko balu, datozen asteetan bidaliko lituzkete behatzaileak, mailaka.
Siriako oposizioak gaur salatu du Baxar al-Assaden aldekoek hainbat eraso egin dituztela Harak eremuan, nazioarteko behatzaileak bertatik igaro ostean.
