Bilera bat egiten ari da kurduen ordezkaritza zabal bat Al-Hasakan, YPG Herriaren Babeserako Unitateak berreskuratutako gune estrategikoan, eta sistema federal baten alde bozkatu dute. Bileraren ostean egingo dute aldarrikapen ofiziala, Abdel Salam Saleh Gizarte Demokratikoaren Mugimenduko buruerako batek azaldu duenez. Kurduen miliziek Kobane askatu zutenetik, EIren hedapenak kolpe gogorrak jaso ditu, Kurdistango YPG Herriaren Babeserako Unitateen aurka, Siria iparraldeko frontean, baina Genevako bake elkarrizketatik kanpo geratu dira, Turkiak Nazio Batuen Erakundeari hala eskatuta.
Siriako Gobernuko ordezkariak eta oposizioko HNC Negoziazioetarako Batzorde Gorena daude Genevan. Biek baztertu egin dute Kurdistanen egindako aldarrikapena. "Horrelako aldarrikapen batek ez du balio legalik, eta, beraz, ez du izango ondorio legalik, sozialik eta politikorik, ez baitu Siriako herri osoaren borondatea adierazten", esan dio Siriako Atzerri Ministerioko iturri batek Sana agentzia publikoari.
Al-Hasaka Siria ipar-ekialdeko hiri nagusia da, eta gerra hasi aurretik 200.000 biztanle inguru zeuzkan; gehienak kurduak, baina arabiarren kopurua nabarmena da. Kurduen lurraldearen hegoaldeko mugatzat hartzen da.
Hain zuzen, John Kerry AEBetako Estatu idazkariak jakinarazi du erasoaldi bat prestatzen ari direla EIri kontrolpean dauzkan eremuak kentzeko. Muturreko talde islamista sunitari Etxe Zuriak ofizialki "genozidioa" leporatu berri dio. "Daex [EIren akronimoa arabieraz] genozida da izatez, ideologiaz eta ekintzaz". AEben esku hartzea "bereziki gutxiengo etnikoen babesean" zentratuko dela esan du Kerryk.
