Terri Schiavo hil da

Martxoaren 18an Schiavo bizirik iraunarazten zuten makinetatik askatzeko agindu zuen Floridako epaile batek, haren senarrak egindako eskaera aintzat hartuz. Senarraren arabera, Schiavok bere onean zela behin baino gehiagotan agertu zuen ez lukeela nahi landare bat bezala bizi, hots, infartu baten ondorioz duela 15 urtetik dagoen egoeran. Senarraren eskaerari arrazoia eman, eta hiletsitako emakumeari elikatzen zuen zunda kentzeko agindu zuen epaileak. Egoera horretan, gehienez ere, bi aste iraungo zuela bizirik iragarri zuten medikuek, eta gaur hil da.

Schiavoren gurasoek egin ahala handiak egin dituzte egun hauetan alabari berriro zunda jartzea lortzeko eta heriotza eragozteko. Hainbat epaitegitara jo dute, baina, guztietan galtzaile atera dira. Aste honetan, AEBetako Auzitegi Gorenak bi aldiz bota du atzera berriro ere Shiavo zundara lotzeko gurasoen eskaera.

Nolanahi ere, auzibideak luze jo du. Duela 7 urte hasi zuen senarrak Schiavo makinetatik aska zezatela galdeginez, eta denbora horretan guztian buruz buruko borroka judizialean ibili dira gizona eta aita-amak.

Martxoaren 18an Floridako epaileak zundatik askatzeko agindua eman zuenean, gainera, AEBetako erakunde politiko nagusiak nahastu ziren auzian: Kongresuak eta Senatuak ez ohiko batzarrak egin zituzten Schiavoren heriotza eragoz zezakeen lege berezia onartzeko, eta George Bush presidenteak oporrak eten zituen lege hori sinatzeko.

Hala ere, botere judizialak beren segitu du, eta uko egin dio berriro ere zundara lotzeko agindua emateari.