Carles Viver Pi-Sunyer presidenteak aurkeztu du txostena, Francesc Homs Kataluniako Gobernuaren bozeramailea ondoan zuela; litekeena da EBren barruan jarraitzea.
Hauek dira aurreikusitako lau jokalekuak: EBn jarraitzea; ateratzea baina berehala sartzea praktikan aldaketarik egon izan ez balitz bezala; ateratzea eta ohiko prozedurei jarraituz EBk onartzea; eta besterik gabe ateratzea. Pi-Sunyerren arabera, lehen bi aukerak dira errealenak. Argudiatu du Katalunia EBtik botatzeak esan nahiko lukeela Europako 7,5 milioi herritar euren eskubiderik gabe uztea, eta gaineratu du kaltegarria litzatekeela hori EBrentzat, zeinak, haren hitzetan, beti jokatzen duen malgutasunez eta logikari jarraituz.
