Donald Trump AEBetako presidenteak dekretu bat sinatu du AEBetara sartzen diren migratzaile sendien banaketa ekiditeko. Presidenteak berak iragarri du horretarako neurriak hartuko zituela gaur. "Familiak elkarrekin mantendu nahi ditugu. Oso garrantzitsua da. Laster zerbait sinatuko du immigrazioari buruz, hori lortzeko", adierazi du.
Haur immigranteen eta haien gurasoen arteko banaketak AEBetan eta handik kanpo protesta erantzun handia eragin du, eta Trumpen gobernuak atzera egitea erabaki du. Egoera horri amaiera emateko dekretua prestatu du Etxe Zuriak, eta presidenteak iluntzean sinatu du.
Trump saiatu da haur immigranteen eta haien gurasoen arteko banaketa presio gisa erabiltzen, AEBetako Kongresuak migrazio politikak gogortu ditzan. Fiskaltzaren irizpide aldaketak ireki du banaketa horietarako bidea. Izan ere, AEBetara legez kanpo sartzen den pertsona oro gaizkile jo du fiskaltzak, baita aurrekari penalik ez dituztenak ere. Ondorioz, immigrante horiek gaizkile gisa auzipetu ditu AEBetako Justiziak, eta haien haurrek ezin izan dute gurasoekin batera jarraitu.
Sei asteko epean, 2.000 haur baino gehiago banandu dituzte beren gurasoengandik. Horrek, AEBetako gobernuak bultzatutako irizpidearen kontrako protesta piztu du AEBetan eta herrialdetik kanpo. Trumpek protestei erantzun die argudiatuz estatuak legea bete duela eta legegileei dagokiela legedia aldatzea.
