Nazio Batuen Erakundeko Batzar Orokorrean erantzun dio Venezuelako presidente Nicolas Madurok aurrez Donald Trumpek egindako gonbitari. Asteartean, ordea, Trump Madurorekin hitz egiteko prest agertu zen, zehaztuz "aukera guztiak" zeudela mahai gainean: "Venezuelak duen egoera tamalgarria da, eta aukera guztiak dira baliagarriak, gogorrenetatik leunagoetaraino, eta badakizue zertaz ari naizen gogorrenez ari naizenean".
Hala, bien arteko desadostasunak handiak badira ere, "elkarrizketak desberdinen artekoak" behar dutela izan nabarmendu zuen atzo Madurok, eta buruzagi estatubatuarrarekin hitz egiteko prest agertu zen. "Herri atsegina da gurea. Ez ditugu AEBak gorroto. Agenda zabalik dugu, eta elkar ulertzeko prestasun osoa", adierazi zuen venezuelarrak.
Ordea, Madurok oso gogoan izan ditu Trumpek berak aste hasieran esandakoak. "Inperio esklabozaleen aurrean amore eman ez duen herria da gurea", ohartarazi du, eta gaitzetsi egin du "Venezuelaren aurka prestatzen ari diren erasoa". Alde horretatik, abuztuaren 4an droneekin egindako erasoa ikertzeko eskatu dio NBEri. "Zantzu guztien arabera, erasoa AEBetan prestatu, finantzatu eta planifikatu zuten. Amaierarik gabeko kanpaina baten jopuntua da Venezuela".
