Kataluniako Tsunami Demokratikoak hurrengo ekintzetarako egunak iragarri ditu, Telegram bidez zabaldu duen mezu batean. Herritarrei egun jakin batzuk gordetzeko eskatu die: azaroak 9, 11, 12 eta 13, eta abenduak 18.
Azaroaren 9a Espainiako hauteskundeen bezpera da. Hau da, bozkatu aurreko hausnarketarako eguna. Tsunami Demokratikoak aditzera eman du estatu osoan prestatuko duela ekintza bat egun horretarako.
Azaroaren 10ean erabakiko dute bozkatzaileek Espainiako Gorteen osaketa berria, eta hurrengo hiru egunetarako ekintzak iragarri ditu Tsunami Demokratikoak. Ez du argitu ekintza horiek non egingo dituen.
Azkenik, abenduaren 18a gordetzera deitu du plataformak. Egun horretan, Bartzelona eta Real Madril futbol taldeen arteko norgehiagoka jokatuko da Kataluniako hiriburuan. Partida bihar jokatzekoa zen, baina atzeratzea erabaki dute, bihar mobilizazio jendetsua espero delako Bartzelonan eta Tsunami Demokratikoak egun horretarako ekintza iragarri zuelako. Pentsatzekoa da futbol partidarekin lotuta egongo dela plataformaren ekintza, egun horretan "etxean jokatzen" dutela adierazi du eta.
