Irak iparraldean PKK-ren egoitzak bonbardatu ditu bart Turkiako Gobernuak. Gainera, atzoko sarekadari jarraipena emanez, PKK-rekin lotura duten beste dozenaka lagun atxilotu dituzte. Horiek horrela, PKK Kurdistango Langileen Alderdiak zalantzan jarri du 2013ko martxoan iragarri zuen su-etena; ez duela zentzurik adierazi du komunikatu batean.
Su-etena hari batetik zintzilik egon daiteke, beraz; asteartean bi polizia hil zituela aldarrikatu baitzuen PKK-k. Elkar lotutako bi arrazoi eman zituen eraso hori justifikatzeko: astelehenean Suruç hirian ezkerreko ekintzaileen aurka izandako eraso suizidarengatik "mendeku hartzeko" —32 lagun hil zituzten—, eta bi polizia horiek "Estatu Islamikoa taldeari laguntzen" ziotelako.
Ez da Turkiak bart eginiko bonbardaketa bakarra izan; Siria iparraldean beste bonbardaketa bat egin du, bigarrena, Estatu Islamikoaren kontra. Inguru horretan segurtasun eremu bat eratuko dutela iragarri du Turkiako Gobernuak, errefuxiatuak jasotzeko. Ahmet Davutoglu Atzerri ministroak adierazi du eremu hori beste herrialdeentzat ere izango dela, jihadistei aurre egiteko. "Zein herrialdek erabiliko duten, hori AEBk erabaki dute", zehaztu du.
